മാഞ്ചസ്റ്റർ: യുകെയുടെ മലയാറ്റൂർ എന്ന ഖ്യാതി നേടിയ മാഞ്ചസ്റ്ററിൽ, ഭാരത അപ്പസ്തോലനായ വിശുദ്ധ തോമാശ്ലീഹായുടെയും വിശുദ്ധ അൽഫോൻസാമ്മയുടെയും സംയുക്ത തിരുനാൾ ആഘോഷങ്ങൾ ഈ മാസം 28ന് കൊടിയേറും.
ജാതി-മത ഭേദമന്യേ യുകെയുടെ നാനാഭാഗങ്ങളിൽ നിന്നായി ആയിരങ്ങൾ ഒത്തുചേരുന്ന മാഞ്ചസ്റ്റർ ദുക്റാന തിരുനാൾ, യുകെയിൽ ആദ്യമായി ആരംഭിച്ച ദുക്റാന തിരുനാൾ എന്ന പ്രത്യേകതയുള്ളതാണ്.
മിഷൻ ഡയറക്ടർ റവ. ഫാ. ജോസ് കുന്നുംപുറത്തിന്റെ നേതൃത്വത്തിൽ ഒരാഴ്ചക്കാലം നീണ്ടുനിൽക്കുന്ന വിപുലമായ ആഘോഷങ്ങളാണ് ഇക്കുറിയും ക്രമീകരിച്ചിരിക്കുന്നത്.
പാരിഷ് ഡേയും ഗാനമേളയും (ജൂൺ 27)
തിരുനാൾ ആഘോഷങ്ങൾക്ക് മുന്നോടിയായി ഈ മാസം 27ന് വിഥിൻഷോ ഫോറം സെന്ററിൽ "GRATIAS 2026' എന്ന പേരിൽ പാരിഷ് ഡേ ആഘോഷിക്കും. മിഷനിലെ വിവിധ കുടുംബകൂട്ടായ്മകൾ അവതരിപ്പിക്കുന്ന കലാപരിപാടികൾ അന്നേദിവസം അരങ്ങേറും.
കൂടാതെ ഐഡിയ സ്റ്റാർ സിംഗർ വിജയി അരവിന്ദ് നായരും പിന്നണി ഗായിക നിയ ജോയും നയിക്കുന്ന ഗാനമേളയും ഈ ആഘോഷത്തിന്റെ പ്രധാന ആകർഷണമായിരിക്കും.
കൊടിയേറ്റും ദിനപൂജകളും (ജൂൺ 28 - ജൂലൈ മൂന്ന്)
ഈ മാസം 28ന് വൈകുന്നേരം മൂന്നിന് മിഷൻ ഡയറക്ടർ റവ. ഫാ. ജോസ് കുന്നുംപുറം കൊടിയേറ്റ് നിർവഹിക്കുന്നതോടെ തിരുനാൾ ആഘോഷങ്ങൾക്ക് തുടക്കമാകും. തുടർന്ന് തിരുസ്വരൂപ പ്രതിഷ്ഠ, പ്രസുദേന്തി വാഴ്ച, വിശുദ്ധ കുർബാന, നവേന, വീടുകളിലേക്കുള്ള അമ്പ് എഴുന്നള്ളിക്കൽ, ഉത്പന്ന ലേലം എന്നിവ നടക്കും.
തുടർന്നുള്ള ദിവസങ്ങളിൽ വൈകുന്നേരം 5.30ന് റവ. ഫാ. തോമസുകുട്ടി വാലുമ്മേൽ, റവ.ഫാ. സുനി പടിഞ്ഞാറേക്കര, റവ.ഫാ. ജോസ് അന്തിയാംകുളം, റവ.ഫാ. എഡ്മണ്ട് മോണ്ട്ഗോമറി, റവ.ഡോ. വർഗീസ് താനമാവുങ്കൽ തുടങ്ങിയ വിവിധ വൈദികരുടെ മുഖ്യകാർമികത്വത്തിൽ വിശുദ്ധ കുർബാനയും നോവേനയും ഉണ്ടായിരിക്കുന്നതാണ്.